Bunnat's Page

សកម្មភាពរីកចំរើនរបស់សមាគម     

នៅក្នុងខែមករា និងខែកុម្ភះ ឆ្នាំ២០១១នេះ សមាគមក្រុមប្រឹក្សាឃុំ សង្កាត់ ខេត្តកណ្តាល សម្រេចបានសមិទ្ធផលលេចធ្លោសំខាន់ៗដូចខាងក្រោម៖
     ១.អនុម័តលើ របាយការណ៍បូកសរុបលទ្ធផលការងារឆ្នាំ២០១០ សេចក្តីព្រាងផែនការ សកម្មភាព និងថវិកា ឆ្នាំ២០១១ សេចក្តីព្រាងវិសោធនកម្មគោលការណ៍ប្រតិបត្តិការសមាគម ដោយកិច្ចប្រជុំ ក្រុមប្រឹក្សាសមាគម។ 
     ២.បង្ហាញ របាយការណ៍បូកសរុបលទ្ធផលការងារឆ្នាំ២០១០ ផែនការសកម្មភាពនិងថវិកា ដល់ស្ថាប័នពាក់ព័ន្ធ និងអង្គការជាដៃគូរ ដើម្បីស្វែងរកការគាំទ្រ។
     ៣.ទិញបានមូតូម៉ាក HONDA Dream 100 cc 2010 មួយគ្រឿង សម្រាប់ប្រើប្រាស់ នៅក្នុងការបំពេញ ប្រតិបត្តិការការងារប្រចាំថ្ងៃរបស់សមាគម។
     ៤.ស្វែងរកមូលនិធិសម្រាប់ឧបត្ថម្ភ ដល់ក្រុមប្រឹក្សាឃុំ និងភូមិ ដែលកំពុងបំពេញភារកិច្ច យ៉ាងសកម្ម និងក្លាហាន នៅតំបន់ភាគខាងជើងនៃប្រទេសកម្ពុជា រួមមានខេត្តព្រះវិហារ និងខេត្តឧត្តរមានជ័យ ដោយប្រមូល បានថវិកាចំនួន R 2,440,000.00 (ពីរលានបួនរយ សែសិបពាន់រៀលគត់)។ 
     ៥.ចូលរួមឧបត្ថម្ភថវិកាចំនួន R 1,000,000.00 (មួយលានរៀលគត់) ក្នុង១គ្រួសាដល់ គ្រួសារសពចំនួន២គ្រួសារគឺ ១.គ្រួសារសព លោកស្រី ឈឹម សារី ជាអនុប្រធានភូមិកណ្តាលកោះ ឃុំកោះខ្សាច់ទន្លា ស្រុកស្អាង ២.គ្រួសារសពលោក ស៊ីម វ៉េង សមាជិក ក្រុមប្រឹក្សាឃុំបន្ទាយដែក ស្រុកកៀនស្វាយ។ សពអ្នកទាំងពីរគឺជាសមាជិកមូលនិធិមរណៈសង្គ្រោះរបស់សមាគម។
     ៦.បែងចែកសៀវភៅសម្រាប់ធ្វើផែនការ របស់អង្គការ unicef ទៅកាន់ឃុំ និងសង្កាត់ ទាំង១២៧ របស់ខេត្ត។
     លទ្ធផលគួរឲ្យកត់សំគាល់ បានឆ្លុះបញ្ចាំងឲ្យឃើញពីការយកចិត្តទុកដាក់របស់ថ្នាក់ដឹកនាំសមាគម គណៈកម្មាធិការប្រតិបត្តិសមាគម ក្រុមប្រឹក្សាសមាគម និងក្រុមប្រឹក្សាឃុំ សង្កាត់ ទូទាំងខេត្ត ព្រមជាមួយការជួយជ្រោមជ្រែងពីសម្ព័ន្ធភាពជាតិឃុំ សង្កាត់ ទីចាត់ការផែនការនិងវិនិយោគខេត្ត រាជរដ្ឋាភិបាល អាជ្ញាធរខេត្ត ស្រុក ក្រុង និងដៃគូរអភិវឌ្ឍន៍ ដែលបានជំរុញ សហការ និងលើកទឹកចិត្ត ដល់ដំណើរការសកម្មភាព របស់សមាគមឲ្យកាន់តែរឹងម៉ាំ និងរីកចំរើន។ ទោះបីជាលទ្ធផលសម្រេចបានឃើញថា មានភាពវិសេសយ៉ាងនេះក្តី ក៍សមាគម នៅមានកិច្ចជាច្រើនទៀត ដែលត្រូវបន្តរសកម្មភាព របស់ខ្លួនព្រោះ ភាពជោគជ័យដែលយើង ទទួលបានកន្លងមក វាគ្រាន់តែជាចំនុចចាប់ផ្តើម តែប៉ុណ្ណោះ ហេតុដូច្នេះស្នើសុំសមាជិកសមាជិការ និងដៃអភិវឌ្ឍន៍បន្តចូលរួមគាំទ្របន្ថែមទៀត ទើបអាចបំពេញបាន តាមសេចក្តីត្រូវការចាំបាច់ ដែលយើងចង់បាន ក៍ដូចជាតម្រូវការ របស់សមាគម ក្រុមប្រឹក្សាឃុំ សង្កាត់ និងប្រជាពលរដ្ឋ ដែលជាម្ចាស់ឆ្នោត។